Biznesmeni shqiptar Luftar Hysa që jeton dhe punon në Meksikë prej vitesh, gjatë ditëve të fundit është vënë në qendër të akuzave nga një media meksikane, se po investon në Shqipëri paratë e kartelit të drogës Sinaloa. Në një intervistë në emisionin “Opinion” në Tv Klan, është pyetur nëse ka lidhje me kartelin meksikan. Ai ka deklaruar se është sulmuar dhe herë të tjera dhe kjo gjë i vjen nga konkurrenca. Po kështu ka mohuar që të ketë njohje apo kontakte me El Mayo, shefin e kartelit meksikan të Sinaloa.
“Nuk është hera e parë që sulmohem, por nuk nisem nga fjalët e gazetave. Në qoftë se këto janë të vërteta, unë duhet të kisha tani urdhër Interpoli, duhet të isha i akuzuar. Unë një njeri nga Belshi, të iki të merrem me kartelin e Sinaloas… Gjthë Meksika e di kush është El Mayo, por të merrem unë me kartelet…. Bëj biznese të ligjshme dhe të vetmen pasuri që kam, kam karizmën time dhe inteligjencën time”.
Biznesmeni Luftar Hysa thotë se edhe në Shqipëri një gazetar ka bërë akuza ndaj tij tre vite më parë, por pa i përmendur emrin.
“Ky sulm ka filluar ndoshta nga kjo studio, sepse këtu një gazetar para tre viteve aludoi rreth meje dhe tha që unë kisha futur dy kartelet e mëdha të Meksikës në luftë me njëra-tjetrën. Tha që karteli i Sinaloas ka hyrë në luftë me kartelin se i ka fut në luftë shqiptari”.
Luftar Hysa ka treguar dhe arsyen që fshihet pas disa fotove të publikuara më parë, ku shihet duke dalë nga zyra e kryeministrit Edi Rama së bashku me një deputet gjerman.
Blendi Fevziu: Është publikuar një foto e juaja duke dalë nga zyra e kryeministrit të Shqipërisë, Edi Rama së bashku me një deputet gjerman. Për çfarë e keni takuar Edi Ramën?
Luftar Hysa: Kam dashur ta takoj Edi Ramën për një gjë shumë të bukur. Kam një mik timin që jeton në Londër dhe e ka emrin Max Miligam. Maxi bën libra dhe është fotograf. Dhe ky njeri ka qenë i interesuar që të bënte libër për Shqipërinë. Unë duke kërkuar, duke parë që Rama është dhe artist, thashë që e vetmja që mund të bëj është t’i prezantoj këtë projekt. Ramën e gjeta nga një deputet i Bundestagut Gjerman.
Hysa ka deklaruar se nuk ka qenë asnjëherë i akuzuar dhe as i dënuar teksa ka shtuar se është një njeri i bizneseve që lëviz nëpër botë, kudo ku tregjet hapen që biznesi i tij të jetë ligjor.
Luftar Hysa: Unë nuk shes byreqe, unë jam njeri i bizneseve që bredh nëpër botë. Gjej hapësira ligjore. Unë jam për bizneset e lojërave të fatit. Kudo që tregjet hapen, shkoj dhe prezantoj veten time nëse ligji ma lejon. Ne kudo që shkojmë për të bërë biznese, që të marrësh një licencë duhet të kalosh nga të gjitha kanalat nga Interpoli. Unë as që kam qenë as i gjykuar, as i dënuar dhe as i akuzuar. Me gjërat e tjera nuk merret. Zyrtarisht zero, as unë dhe as vëllezërit e mi dhe as punëtorët e mi.
