Botuesi Henri Çili ka dhënë detaje rreth momentit të arrestimit të tij, duke treguar se nuk e priste një gjë të tillë.
I ftuar në emisionin “Open” në Top Channel, Çili tha se është ndaluar gjatë kohës që po shkonte në shtëpi.
“Nuk kisha asnjë ide. Rreth orës 20:00 teksa po shkoja për në shtëpi u ndalova. Më kërkuan që të shkonin të bënim kontroll në banesë dhe në zyrë”, tha ai.
Çili tregon se vetëm të nesërmen i kanë treguar, se kishte një urdhër nga prokuroria për ndalimin e tij. Sipas tij, herën e fundit që ai ka qenë në Përmet ka qenë në vitin 2014.
“S’më kishte vajtur mendja se do ndodhte diçka e tillë. 72 orë në paraburgim kaluan me ndjesinë e pafajësisë dhe me kuriozitetin për të kuptuar se me çfarë provash akuzohesha.
Në Përmet kam qenë vetëm një herë në 2014. Isha duke shkuar për në shtëpi dhe më çojnë në Komisariat. Më kontrolluan zyrën dhe banesën. Kontrollet janë zhvilluar nga ora 8 deri në 12 të darkës. Akuzohem për 4 ose 5 akuza”, shtoi ai.
