Si pasojë e koronavirusit janë mbyllur kufijtë në Spanjë dhe thuhet se 17 shtetas shqiptarë mes të cilëve edhe fëmijë kanë mbetur të bllokuar.
“News24” raporton se shqiptarët nuk mund të kthehen dot pas mbylljes së kufijve nga Spanja, e cila po përballet me një situatë të rënduar nga COVID-19 me 11,826 persona të infektuar.
Thuhet se shqiptarët kishin shkuar në Spanjë për pushime.
Ata kanë kërkuar ndihmë në ambasadën shqiptare në Madrid, por nuk kanë marrë një përgjigje pozitive dhe as garanci.
Shtetasit shqiptarë nuk mund të udhëtojnë në asnjë vend tjetër, pasi Spanja i ka bllokuar kufijtë dhe nuk lejohen lëvizjet.
Ata kanë bërë apel për ndihmë nga shteti që të kthehen në atdhe.
Kujtojmë se Spanja është vendi i dytë në Europë pas Italisë, me numrin më të madh të të prekurve. Numri i viktimave ka arritur në 491 sipas “Reuters” dhe ka pasur një rritje prej 2000 personash të infektuar në 24 orë.
