Dy deputetët Myslim Murrizi dhe Artur Roshi paditën Kuvendin lidhur me kthimin e pagës për muajt mars, prill dhe maj. Një periudhë që përkonte me izolimin si pasojë e pandemisë.
Ata dolën kundër Ruçit, ndonëse ju kërkua të kontribuojnë me pagën e tyre për të paktën tre muaj, për të përballuar ekonomikisht luftën dhe pasojat e pandemisë Covid 19.
Më 2 prill 2020, me vendimin 44, me shumicë të votave Byroja e Kuvendit vendosi që deri në përfundim të pandemisë Covid 19, por jo më shumë se tre muaj deputetët të përfitojnë pagë 50 % të pagës aktuale neto. Ky vendim sipas deputetëve ishte i padrejtë, dhe duhej anuluar, pasi atyre u ishin cënuar interesat e ligjshme.
Dy deputetët e opozitës së re, Myslim Murrizi dhe Artur Roshi kanë fituar gjyqin ndaj Kuvendit, duke detyruar këtë të fundit që t’u paguajë pagën e plotë gjatë 3 muajve të pandemisë, mars-maj.
Në vendimin e Gjykatës Administrative së Shkallës së parë, argumentohet se dhurimi i pagës është diçka e vullnetshme dhe jo kolektive.
“Gjykata thekson se mandati i deputetit është individual dhe përgjegjësia mbi sjelljen e gjithsecilit mbi këtë mandat shihet rast pas rasti, dhe nuk mund të justifikohet me sjellje kolektive. Në rastin konkret, ndalesa e pjesshme në masën 50% të pagës mujore neto për paditësit Myslim Murrizi dhe Artur Roshi, është bërë në kundërshtim me ligjin, pasi situata e rëndë ekonomike e shkaktuar nga COVID-19, nuk përbën shkak të përligjur për cënimin e pagës së deputetit, pasi sikurse u theksua më sipër, dhënia e kontributit financiar me qëllim përballimin dhe lehtësimin e kësaj situate është një akt i vullnetshëm dhe jo i detyruar”, thuhet në arsyetimin e gjykatës.
Përpos pagës, kjo pagesë do t’i reflektohet edhe në librezën e punës, kërkesë kjo e dy deputetëve. Aktualisht Kuvendi i Shqipërisë ka 122 deputetë, ndërsa vetëm Murrizi e Roshi rezulton se kanë depozituar padinë duke kërkuar gjysmën e pagës së mbajtur për tre muajt.
