Gjykata e Shkallës së Parë ka lënë në burg shtetasin Bajram (Barush) Bregun, i arrestuar të shtunën gjatë një operacioni blic në Komunën e Parisit, nga RENEA dhe FNSH.
Ai është i dënuar me 4 vite burg për kultivim të narkotikëve si dhe për armëmbajtje pa leje. Bajram Bregu cilësohet si person me rrezikshmëri të lartë, si dhe dyshohet për ngjarje të tjera kriminale.
Bregu njihet si krahu i djathtë i Ibrahim Liçit, autorit kryesor të dyshuar për vrasjen e vëllezërve Bilali me 30 mars të këtij viti dhe pjesëtar i familjes Liçi të cilët tashmë prej më shumë se një viti janë në përplasje me grupin tjetër kriminal Bajri.
Barush ose Bajram Bregu vitin e kaluar gjatë ndjekjes nga policia e Shkodrës arriti që t’i shpëtojë ndërsa përplasi me mjetin e tij dy patrulla të policisë duke iu shpëtuar ndjekjes.
Përgjatë gjithë kësaj kohe ka qenë person i shpallur në kërkim dhe pas një viti u arrestua në Tiranë në banesë me qera tek “Komuna e Parisit”. Barush Bregu dyshohet nga policia e Shkodrës edhe për një sërë ngjarjesh të tjera kriminale së bashku me Ibrahim Liçin. Policia dyshon se Barush Bregu ka ndihmuar shokun e tij Ibrahimin në vrasjen e dyfishtë të vëllezërve Bilali por edhe në ngjarje të tjera kriminale. Barush Bregu dyshohet edhe si personi që ka ndihmuar Ibrahim Liçin në çdo lëvizje të këtij të fundit, raporton BW.
Bashkë me 33 vjeçarin u kap edhe Bajram Çekorja, 21 vjeç banues në Shkodër i dyshuar për përkrahje të Barush Bregut.