Nënkryetari i Partisë Demokratike, Edi Paloka teksa ka folur për dekriminalizimin, u shpreh se qeveria ka thyer rekorde duke kaluar nga një skandal në tjetrin.
I ftuar në “News24”, ish-deputeti demokrat tha se politikanët që janë të inkriminuar duhet të largohen një orë e më parë, ndërsa theksoi se vetëm “dajaku” i fut në rrugën e duhur, duke shtuar që kjo “mbetet në duart e shqiptarëve”.
“Ti i denoncon një skandal ai të bën tjetrin. Pra kanë arritur në këtë pikë, duket se u ka rrëshqitur mendja dhe thonë se ne jemi zotër dhe nuk pyesim askënd. Doli horr, vëri shkelmin, qëroji. Sot mund të jetë Rama nesër mund të jetë Basha. Dajaku duhet t’i drejtojë politikanët shqiptarë, ndryshe do të vijojnë këto lojëra. Dajakun do ta pranoja me gjithë qejf nëse do ta bëja veten. Por kjo mbetet në duart e shqiptarëve”, deklaroi ai.
Nga ana tjetër, i pyetur se sa beson tek reforma një drejtësi, ish-deputeti tha: “Do isha njeriu më i lumtur në botë, nëse të gjitha ato që po shohim të ishin të vërteta. Do isha më i lumturi, nëse do ndodhte, për këdo në politikë, që të kapeshin këta të mençurit, milionerët, nga të gjitha kahet. Unë do ndihesha i vlerësuar, budalla 30 vite, por e mora një vlerësim. Nuk e kam këtë besim”.
