Kreu i grupit demokrat në Kuvend, Mylim Murrizi, ka braktisur mbledhjen e Këshillit Politik, me pretendimin se gjithë puna ka ngecur në debatin sesa firma duhet për të dërguar letrën e përgatitur, për të marrë një rekomandim nga OSBE-ODHIR. Ai zbuloi se kishte pyetur vetë ekspertin që ndodhej në mbledhjen e Këshillit Politik, i cili i kishte thënë se numri i firmave nuk përbënte problem. Murrizi tha me ironi se gjatë dy orëve është bërë vetëm 20 minuta diskutim, dhe në pjesën tjetër të kohës janë zënë për një letër. Po kështu ka deklaruar se nuk ka dëshirë që të bëj asnjë lloj koalicioni me asnjë nga palët.
“Rrinë kot dhe shohin njëri-tjetrin në sy. U ka ngelur sharra në gozhdë dy palëve. Janë bërë pishman më duket për ndryshimet në Kushtetutë.
Por nuk kanë mundësi më. Listat e hapura dhe propozimi i kandidatëve janë në Kushtetutë dhe nuk i ndërron dot ky Këshill.
Ika dhe i lashë në çlirësinë e tyre. Po zihen për një letër, që t’ja dërgojnë OSBE-së. E pyeta përfaqësuesin nëse duhen patjetër 4 firma, ai më tha duhet të shkojë në Poloni dhe më tha nuk e kemi me normë.
Shpresoj që të mos e quajnë herezi, se prej 2 vitesh i janë drejtuar Venecias. Nëse sebepi është firmoja e një letre për të pyetur, nuk e meritojnë shqiptarët të mbeten peng”, u shpreh Murrizi.
