Dalin detaje të tjera në dritë nga ngjarja e mbrëmshme, ku një 65-vjeçar i infektuar me COVID-19 u hodh nga kati i katërt i spitalit “Shefqet Ndroqi”.
Shkëlqim Topollai i afërmi i Hasan Mirës ka treguar për gjendjen e tij shëndetësore përgjatë ditëve të fundit.
Në një prononcim për Abc News, Topollai tha se 65-vjeçari ishte infektuar katër ditë më parë dhe ishte shtruar në spital pas dy ditësh.
Sipas tij, Mira ka shfaqur shenja agresiviteti pas shtrimit në spital dhe për këtë arsye stafi e ka vendosur në një dhomë më vete. Më tej, ai tregon se viktima nuk ka pranuar të mbajë maskën e oksigjenit.
Sa i përket pretendimit të mbesës se ai vuante nga depresioni, Topollai sqaroi se nuk është e vërtetë. Sipas tij, problemet e 65-vjeçari kanë nisur pas shtrimit në spital.
“Hasani kishte rreth katër ditë që vuante. Pas dy ditësh ishte rënduar situata e tij dhe vendosëm ta sjellim në spital.
Nga të dhënat që kemi ai është acaruar edhe ka qenë i çekuilibruar dhe i nervozuar dhe nuk ka dashur të mbajë oksigjenin dhe ka qenë shumë i acaruar. E kanë dërguar në dhomë vetëm pasi ka shfaqur shenja dhune dhe agresiviteti, paqëndrueshmërie.
Nuk besoj se është çështje spitalore, por mbase nga paniku. Nuk e di a ka pasur telefon. Ka folur me të vëllain kur ka qenë i shtruar në spital. Nuk ka qenë i qetë fare.
Në kohën kur ka qenë në spital ka qenë i qetë. Nuk vuante nga depresioni. Nuk është kuruar asnjëherë. Gjetan Gjetani ka komunikuar më shumë se ne nuk kemi nga marrim informacion.
Këto m’i tha vëllai mua. Kur ka shkuar në spital ka qenë në një dhomë jo vetëm dhe ka shfaqur shenja agresiviteti. Për këta arsye e kanë veçuar për të mos shqetësuar pacientët e tjerë. Ka qenë njeri i rregullt, ka pasur një biznes, ka qenë mirë mendërisht”, tha ai.
