26 zyrtarët kosovarë të cilët dyshohen se janë helmuar nga zarfet me vota të cilat kanë ardhur nga Serbia, janë paraqitur në spital me kruarje, djegie dhe temperaturë.
Doktorët e spitalit kanë treguar për Express, se pacientët kanë pasur simptoma të temperaturës, kruarjes dhe djegies në fytyrë e duar.
“Të gjithë këta pacientë ishin tek ne. I trajtuam, mirëpo i referuam për në QKUK. Kishin temperaturë, djegie e kruarje në fytyrë e duar. Ishin të shqetësuar”, thanë mjekët.
Ndërkohë, policia e Kosovës ka nisur hetimet për zbardhjen e ngjarjes. Procesi i numërimit të votave të ardhura nga Serbia ka nisur mëngjesin e sotëm. Mirëpo ai është ndërprerë pas disa minutave për shkak të kutërbimit.
Megjithatë, në qendrën e numërimit dhe rezultateve edhe të dielën po vazhdohet me rinumërimin e vendvotimeve, për të cilat ka vendosur KQZ, gjatë kësaj jave. Sipas zëdhënësit të KQZ, Valmir Elezi deri të shtunën në mesnatë janë rinumëruar 141 prej 314 vendvotimeve dhe se ky proces po vazhdojnë edhe të dielën.
