Të tjera detaje kanë dalë lidhur me ngjarjen e rëndë ndodhur ditën e djeshme në Bulqizë, ku një 27-vjeçar u gjet me plumb në kokë në banesën e tij.
Dyshohet se i riu ka vrarë veten, ndërsa shkaqet që e kanë çuar drejt këtij akti mbeten ende të paqarta.
Mësohet se 27-vjeçari ka qëlluar veten me pistoletë, teksa në banesë nuk kishte asnjë person tjetër. Familjarët, pasi dëgjuan krismën shkuan në shtëpi, ku e gjetën të mbuluar në gjak.
Pas mbërritjes në Spitalin Rajonal të Bulqizës, mjekët konstatuan se i riu kishte ndërruar jetë dhe se nuk mund të bënin asgjë për ta rikthyer.
Ndërkohë, grupi hetimor, i cili po punon për zbardhjen e ngjarjes ka marrë në pyetje familjarët e 27-vjeçarit, për të mësuar më shumë mbi atë që ka ndodhur. Ndërsa deklaruan se tragjedia u ka ardhur në mënyrë të papritur, ata shprehen se viktima nuk kishte shfaqur asnjë shqetësim para tyre, ku treguan se nuk vuante nga probleme të shëndetit mendor.
Policia ka ngritur dy pista hetimore, ku kryesorja është ajo e vetëvrasjes për shkak të gjendjes depresive. Pavarësisht se i riu nuk ka shfaqur shenja të dukshme, ai mund të ketë vuajtur nga depresioni, që e ka shtyrë drejt vetëflijimit.
Nga ana tjetër, nuk përjashtohet mundësia që i riu të ketë qëlluar veten me pistoletë për shkak të ndonjë konflikti që mund të ketë pasur me familjarët, apo nga ndonjë histori e dështuar dashurie.
