Gjykata e Shkallës së Parë në Shkodër përmes gjyqtares Arta Llazari ka shpallur të paligjshëm arrestimin e tre punonjësve të Administratës të Zonave të Mbrojtura. Kujtojmë që Refik Zagani, Vesel Tusha dhe Palë Keçi u arrestuan nga policia në 17 dhjetor në kuadër të operacionit “Bregdet i Pastër”.
Tre punonjësit e ADZM Shkodër u arrestuan të dyshuar për “shpërdorim detyre”, hetim të cilin gjykata e ka hedhur poshtë.
Në njoftimin e policisë pas arrestimit thuhej se tre të arrestuarit janë përgjegjës për një sërë shkeljes si gërmime, shpyllëzime, rrethime me gardh me rrjetë dhe me shtylla betoni. Sipas policisë këta punonjës të ADZM kanë pasur për detyrë parandalimin, zbulimin dhe luftimin e dëmtimit, pushtimit, shpërdorimit, tjetërsimit, shkretëtirëzimit apo degradimit të natyrës, të pyjeve, të tokës pyjore dhe cenimit nga ndërhyrjet e pakontrolluara në mjedisin natyror e ujor të zonës së mbrojtur.
Për të tre të dyshuarit gjykata rrëzoi pretendimet e prokurorisë dhe ndaj tyre vendosi masën “detyrim paraqitje”. Arrestimi i tyre u shpall i paligjshëm.
