Mjeku i Qendrës Spitalore të Traumës, Fitim Marku, i cili u prangos më 23 shtator për korrupsion, ndodhet në gjendje të rëndë shëndetësore. Mjeku ka pësuar ishemi cerebrale ndaj është dërguar menjëherë në spital. Aty pritet që t’i komunikohet masa e sigurisë që do të caktohet nga gjykata. Mjeku reanimator Fitim Marku dyshohet se ka marrë ryshfet në këmbim të shërbimit nga qytetarët në spital.
Pritet që sot togat e zeza të Tiranës t’i komunikojnë Fitim Markut masën e sigurisë. Do të jetë gjyqtari Gerd Hoxha, i cili në këto kushte duhet të shkojë në ambientet e spitalit për të njoftuar personin e arrestuar për masën e sigurisë.
Për mjekun kishte patur shumë denoncime se merrte para, dhe kjo ka bërë që policia ta monitoronte deri në momentin e prangosjes. Në spital është futur si pacient një agjent i infiltruar, i cili i ofroi mjekut shumën prej 20 mijë lekësh, të cilën ai nuk e ka refuzuar.
