Kryetari i ish-të përndjekurve politikë të Mirditës, Kol Nikolli, u arrestua mesditën e sotme nga policia, në kohën kur po kalonte kufirin për të shkuar drejt Italisë. Atij i është komunikuar urdhër-arresti, lëshuar në lidhje me protestën e muajit Mars kundër rritjes së çmimeve. Por Nikolli ka një tjetër variant të ngjarjes, ndërsa prentendon se ai për arsyet e tij familjare nuk ka qenë i pranishëm në atë protestë, sikundër akuzohet.
Nikolli ka thënë në një intervistë për “Report Tv”, se ndalimi i tij është bërë për arsye politike.
“Po, jam në furgon të policisë. Isha nisur për në Itali për arsye familjare të miat, dhe kur arrita në kufi me ndaluan për arsye të marrjes në protestën e 9 Marsit.
Unë nuk kam qenë prezent fare në atë protestë. Më thanë se mbi mua rëndojnë 4 akuza; “organizimi në protestë”, “pjesëmarrje në protestë”, “kundërshtim i forcave të rendit”. Unë nuk kam qenë fare prezent në protestë. Unë nuk kam pasur asnjë lloj komunikimi. Është e qëllimshme, nga punonjësit e policisë, pasi unë nuk kam shkelur asnjë lloj rrethane. Nuk kam qenë asnjëherë i ndaluar, pasi nuk e shkel ligjin. Jam njëkohësisht edhe drejtues i degës së PD-së. Mund të jetë bërë me sfond politik”, tha Nikolli.
