Ish-kreu i Autoritetit Rrugor shqiptar, Dashamir Xhika, është lirua sot nga burgu. Gjykata e Apelit të Krimeve të Rënda ka pranuar kërkesën e avokatit, duke vendosur që Xhika të hetohet në masën e sigurisë “arrest shtëpie”.
Gjykata e Krimeve të Rënda, ndryshoi sot masën e sigurisë për ish-drejtorin e Autoritetit Rrugor nga “arrest me burg” në “arrest shtëpie”.
Në vendim theksohet se “Xhika nuk ka rrezik për tu larguar jashtë vendit, dhe hetimet kanë përfunduar dhe nuk mund të ndërhyjë në hetime. Është person i arsimuar dhe nuk ka rrezik për të ikur”.
Xhika u vu në pranga në shkurt të këtij viti, me akuzën e “korrupsionit” dhe “shpërdorimit të detyrës”. Së bashku me 2 ish-vartësit e tij, Albens Alite dhe Aksel Qorduku, Prokuroria i akuzon se i kanë shkaktuar shtetit një dëm prej disa miliona dollarësh.
