Sot kryebashkiaku i Lushnjes, Fatos Tushe u arrestua me urdhër të SPAK, nën akuzën e korrupsionit. Operacioni erdhi pas zbulimit të aferës korruptive me ndërtimin e një kanali vaditës, projekt me vlerë 24 milion lekë. Ai në bashkëpunim me të tjerët ka abuzuar me këtë tender, duke përfituar shuma të mëdha financiare.
Kryebashkiaku Fatos Tushe, dy vite më parë i ka shpëtuar një atentati në zyrë, ku e plagosur rëndë mbeti edhe sekretarja e tij.
Tushe dhe sekretarja e tij mbetën të plagosur, pasi ish-shoferi i tij Gëzim Saraçi hodhi një granatë në zyrë. Nga shpërthimi i granatës mbeti i plagosur kryebashkiaku Tushe si dhe sekretarja e tij Erisa Qalliu. Granata ofensive ka shpërthyer poshtë një tavoline, e cila ndodhej në paradhomën e kryetarit të Bashkisë Tushe. Sipas ekspertëve anti-eksploziv, kjo ka qenë arsyeja e humbjes së fuqisë së granatës luftarake.
Njohja e 49-vjeçarit me kreun e Bashkisë së Lushnjes është e hershme. Fatos Tushe nuk ka bërë asnjë kallzim penal në polici, lidhur me shantazhet e vazhdueshme nga ish-shoferi i tij personal.
Në 2017, Gëzim Saraçi u largua për herë të fundit nga organika e Bashkisë së Lushnjës, ndërsa burime nga brenda institucionit theksojnë se, e njëjta gjë kishte ndodhur edhe dy herë të tjera.
