Efektivi i shpallur në kërkim nga Policia e Shtetit, Gani Dama ka reaguar për herë të parë në lidhje me “arratisjen” e tij.
Përmes një deklarate për mediat, efektivi nuk është arratisur por se ka shkuar në Itali për shkak të një problemi familjar. Ai shton se ka marrë edhe leje nga drejtoria vendore e Policisë Durrës.
Gani Dama deklaron se do të kthehet shumë shpejt në Shqipëri, ku dhe do të sqarojë të gjitha akuzat në drejtim të tij.
“Jam në Itali me leje të firmosur nga Policia. Përmes Tv mora vesh se jam shpallur në kërkim. Nuk po ia mbath nga askush, aq më pak nga drejtësia. Jam larguar nga data 9 janar në Itali për arsye familjare. Kur të kthehem, do të përballem me drejtësinë”, ka thënë ai.
Gani Dama, është polici i Patrullës në Durrës, që u shpall në kërkim në kuadër të operacionit “Abuzuesit”, i finalizuar dy net më parë në Durrës. Pas një hetimi tri mujor nga ana e SHÇBA dhe Prokurorisë së Durrësit.
