Këngëtari Aleksandër Gjoka, në një rrëfim ekskluziv në “Këndo këngën time”, zbuloi shumë të pathëna rreth karrierës së tij artistike. Ai zbuloi anën e panjohur të historisë që lidhej me këngën “Twist Again”.
“Është fituese në festivalin e Pranverës në vitin 1993, me kompozim të Luan Zhegut dhe tekst të Alqi Boshnjakut, i cili nuk jeton më. Unë kam pasur një këngë të Markelian Kapedani, mirëpo Marku po e zvarriste. Po e zvarriste, dhe në një moment i them: “O Mark, do e bësh apo mos të marrë pjesë fare…”.
Ndërkohë që në anën tjetër Luan Zhegu ishte duke bërë “Twist Again”, por e kishte për një këngëtar tjetër që sot është në Amerikë, Gjergj Tase. Dhe më thotë mua: “Sandër, meqenëse Marku po ta zvarrit këngën, a do vish me ne? Jo, i thashë unë. Nuk mund të vijë pa marrë leje nga kompozitori, sepse janë caktuar. Në ujdi me atë, Marku më tha nuk kam kohë dhe shko te Luani”. Dhe kështu kënga përfundoi tek Aleksandër Gjoka.
Kënga “Twist Again” u shpall fituese e festivalit të Pranverës në vitin 1993, dhe mbeti në historinë e muzikës shqiptare si një ndër këngët më të bukura.
