Turqia në shtetrrethim gjatë fundjavës

Turqia ka riaplikuar izolimin për herë të dytë. Gjatë kësaj fundjave, Turqia është futur në izolim, pasi rastet e reja me koronavirus kanë shënuar numra rekord gjatë ditëve të fundit.

Një ditë më parë, Turqia regjistroi 32.736 raste të reja. Kjo shifër është më e larta e regjistruar, që nga muaji mars.

Dje ka hyrë në fuqi shtetrrethimi që do zgjasë deri të hënën në mëngjes. Mbyllja nisi që të premten në orën 21:00, dhe do përfundojë të hënën në orën 05:00.

Presidenti turk Recep Tayyip Erdoğan, njoftoi se të hënën do të ketë kufizime të reja, duke përfshirë një orë policore gjatë ditëve të javës dhe një shtetrrethim në fundjavë.

Disa sektorë, duke përfshirë prodhimin, furnizimin, shëndetësinë dhe bujqësinë, do të qëndrojnë hapur gjithmonë.

Turqia është shteti i katërt në botë me numrin më të lartë të rasteve të reja, pas Shteteve të Bashkuara, Indisë dhe Brazilit, tre shtete këto që kanë numër më të lartë të popullsisë krahasuar me Turqinë.