Presidenti turk Recep Tayyip Erdogan po përballet me protesta të ashpra, kryesisht në rrjetet sociale, pas vendimit për të ndaluar muzikën në të gjitha ambientet e argëtimit pas mesnatës. Ky vendim vjen pasi është vendosur nga ana e autoriteteve heqja e orarit të shtetrrethimit nga 1 korriku. Por presidenti turk, Recep Tayyip Erdogan, ka shkaktuar një revoltë të hapur teksa shprehej: “Të mos i vijë keq njeriu, por askush nuk ka të drejtë të shqetësojë të tjerët, natën”.
Si një kundërpërgjigje e drejtpërdrejtë ndaj thirrjes së presidentit, në rrjetet sociale u shfaq menjëherë hashtagu me mbishkrimin “na vjen keq”.
“Ne jemi ofenduar” (#kusurabakiyoruz), është hashtag që është bërë viral në këto orë, duke përmbysur fjalët e kreut të shtetit. Protesta të menjëhershme erdhën gjithashtu edhe nga bota e muzikës.
“Nëse të shqetëson, mos e dëgjo”, komentoi këngëtarja Gaye Su Akyol në Twitter, duke iu drejtuar presidentit Erdogan.
“Muzika nuk shqetëson, por shëron shpirtrat e shqetësuar. Muzikantët nuk shqetësojnë, ata prodhojnë art”, shkroi në Twitter, këngëtarja Aylin Aslim.
Reagime të forta vijnë gjithashtu nga opozita, sipas të cilëve ekzekutivi “nuk po lufton me koronavirusin, por me stilin e jetës së njerëzve”.
