Presidenti i Turqisë, Recep Tayyip Erdogan, ka përsëritur sërish mesazhin se Turqia pret nga BE që të jetë e paanshme dhe konsekuente. Erdogan ka bërë një bisedë telefonike me kreun e Këshillit Evropian, Charles Michel, ku në veçanti është diskutuar Mesdheu Lindor.
Erdogan ia ka bërë të qartë kreut të Këshillit Evropian, se Turqia pret që organizatat e BE-së dhe vendet anëtare të miratojnë një qëndrim objektiv dhe konsekuent për të gjitha çështjet rajonale, veçanërisht për Mesdheun Lindor, pa u mashtruar nga provokimet.
Erdogan ka ulur tonet dhe kërcënimet, ndryshe nga herët e fundit, ndërsa ka përçuar mesazhin se Turqia është e hapur për një zgjidhje që mbron të drejtat e të gjitha palëve me një dialog miqësor, dhe negociata të bazuara në drejtësi.
Ai gjithashtu theksoi se Turqia me vendosmëri do të vazhdojë të mbrojë të gjitha të drejtat dhe interesat e saj kudo dhe çdo herë, kundër të gjitha iniciativave që injorojnë të drejtat e saj me hapa të njëanshëm.
Dy udhëheqësit diskutuan gjithashtu për marrëdhëniet Turqi-BE, dhe zhvillimet e tjera rajonale, thuhet në njoftim.
