Kryetarja e Bashkisë së Shkodrës, Voltana Ademi është shprehur se sezoni turistik rrezikon të dështojë nëse nuk përcaktohen rregullat nga ana e qeverisë.
Në një prononcim për Report Tv, Ademi tha se biznesi është përballur me vështirësi të shumta dhe se duhet një mbështetje nga qeveria sidomos për qytetet bregdetare.
“Është shqetësim i madh sepse biznesi ecën përpara dhe ka marrë disa masa, por nga ana tjetër qeverisja është në pozicion “stand by”. Do të mjaftonte të kishim një vendimmarrje të qartë, që të gjithë të kishim të bërë përgatitjet në aspektin formal të kontraktimit për funksionimin e stacioneve të plazhit në mënyrë që kur të binte gongu të ishim të gjithë bashkë. Në kushtet e pandemisë nevojitet mbështetje qeveritare për lehtësime ndaj biznesit që lidhet me likuiditetin dhe mundësinë e uljes së barrës së papunësisë”, tha ajo.
Ademi deklaroi se projektvendimi për faljen e detyrimeve te biznesit te vogël është ende ne tryezën e Këshillit Bashkiak, pasi sipas saj ka pasur kundërshti. .
“Kemi hartuar projektvendimin për lehtësimin fiskal për muajt mars prill maj duke hequr tarifat e shërbimeve. Kjo nuk u miratua në mbledhjen e parë, e kemi ridërguar dhe me shpjegime më shumë”, shtoi ajo.
