Në një konferencë për mediat, kreu i PD-së Sali Berisha ka shprehur shqetësimin për turizmin. Duke bërë një bilanc të situatës, Berisha u shpreh se bizneset nuk po gjejnë punëtorë dhe ndodhur në këto kushte, duhet ndërhyrja emergjente. Duke ia faturuar pasojat Ramës, për shkak të politikave të ndjekura, Berisha shtoi më tej se turizmi në vend po pëson një dramë të madhe. Ai e mbylli fjalën me paralajmërimin se shqiptarët do i japin kryeministrit Rama përgjigjen e merituar.
“Keni dëgjuar ndonjë masë të vetme nga qeveria, për të mbështetur turizmin? Punëson një çerek milionë qytetarë në sezon. Nuk gjejnë punonjës dhe punëtorë. Ky njeri ka ndërmend të sjellë punëtorë nga Bangladeshi, sepse po i largon të vetët.
Ky që blen like nga Bangladeshi, standardet e botës virtuale, po i përdor për botën reale. Ndërhyrja emergjente është e domosdoshme. Duhet indeksim urgjent, sepse në këtë mënyrë po falimenton sektori ku shqiptarët kanë investuar pothuajse gjithçka kanë pasur.
Kam këtu foto që janë të frikshme, po t’ua tregoj. Turizmi në Shqipëri po pëson një dramë të madhe si shkak i politikave të Edi Ramës. Të gjitha këto kanë vetëm një zgjidhje. Largimin e Edi Ramës dhe ekipit të tij vjedhës. Shtatori po vonon.
Qytetarët shqiptarë duhet të përgatiten dhe do përgatiten për t’i dhënë përgjigjen më të merituar këtij njeriu që nuk respekton, për të cilin realiteti i hidhur shqiptar nuk ekziston. Këto ditë po afrohen. Shqiptarët do i japin përgjigjen e merituar”.
