Ministri i Turizmit dhe Mjedisit, Blendi Klosi mori pjesë në panairin Ndërkombëtar të Turizmit, ku ftoi operatorët e ndryshëm turistikë të vizitojnë Shqipërinë dhe i njohu ata me diversifikimin e ofertës turistike dhe lançimin e festave lokale.
Klosi në fjalën e tij theksoi se vendi ynë ka shanse reale për turizmin, gjithashtu u shpreh se panairi ka si synim që të promovojë turizmin shqiptar. Ai shtoi se synimi është që Shqipëria të jetë në standardet e duhura dhe të konkurrojë me shtete si Greqia, Mali i Zi, Kroacia apo Italia.
“Ky panair shërben për të promovuar turizmin shqiptar. Shqipëria ndodhet në një rajon konkurrues për turizëm, pasi ka përreth shtete konkurruese si Italia, Mali i Zi, Kroacia, Greqia etj. Ne duhet të konkurrojmë fuqishëm me këto shtete, të marrim më të mirën e tyre për turizmin tonë. Kjo është beteja jonë e përbashkët. Duhet të ngremë shërbime turistike, të ngremë mikpritjen në nivel të lartë, si një traditë e shqiptarëve që na dallon nga të tjerët. Sfida jonë është për 10 milionë turistë. Vendi ynë i ka të gjitha: mite, heronj, male, fusha, lumenj, dete dhe ne duhet t’ju japim kuptim të gjitha vlerave tona. Ka mungesa në njerëz të kualifikuar, por do bëjmë gjithçka për t’ja dalë”, tha ndër të tjera Klosi.
