Nga Alfred Lela
Në kalendarin politik të Lulzim Bashës, një personi të zënë gafil në piruetat e veta, ka ardhur një ditë kur, vetë ai dhe as ekipi këshillues nuk kujdesen më për logjikën e gjërave.
Menjëherë pas rezultatit të zgjedhjeve të 25 prillit, kërkesave për dorëheqje, ardhur nga një anëtar Kryesie dhe kryetari i Këshillit Kombëtar të PD, njëkohësisht ish-President, ai iu përgjigj duke thënë se do të niste një ‘tur faktmbledhës’ nëpër Shqipëri.
Ashtu bëri. Dy javë pas humbjes në zgjedhje, prej dy ditësh tashmë, ai e nisi ecejaken nëpër Shqipëri duke u takuar me anëtarë të Partisë Demokratike. Çka duhet thënë është se ‘turi faktmbledhës’ filloi pasi eksponentë të PD-së kishin dorëzuar 9 dosje voluminoze, ku ankimonin rezultatet në 9 qarqe të vendit. Duhet përmendur se janë 12 qarqe gjithsej, numër që shpjegon se Basha e ka ndalur turrin e ankesave te portat e mosnjohjes së zgjedhjeve. Të cilat do të donte, por nuk guxon të mos i njohë.
Dorëzimi i dosjeve, ndërkohë që është pjesë e procedurës dhe repertorit të demokracisë, bën një gjë tjetër. Anulon turin e Bashës nëpër Shqipëri. Në kuptimin që, nuk përputhen lajmërimi për një ‘tur faktmbledhës të masakrës zgjedhore’ me faktin se e ke dorëzuar ndërkohë ‘inventarin’ e shkeljeve në institucionet përkatëse.
Hipokrizia e turit mund të zgjidhet duke i vënë gjësë emrin që ka: ecejakja nëpër Shqipëri nuk është për ‘zgjedhjet e manipuluara’, por për karrigen e kryetarit. Me anë të tij ‘kryetari në detyrë’ i demokratëve mbush zbrazëtinë komunikative që do të linte në sistem po të heshtte; siguron alibinë e ‘zgjedhjeve të humbura’; mundohet ta karikojë bazën demokrate dhe, çka është gjithaq e rëndësishme, vë gurin më të parë në radhë si kandidat për zgjedhjet në parti, të cilat sipas statutit duhet të zhvillohen më 22 korrik.
Kjo i lejon atij një avantazh thelbësor me kandidatët e tjerë potencialë në garën e pritshme, dhe i mundëson hekurosjen e rrudhave të pakënaqësive që kanë lindur ndërkohë në bazë pas humbjes. Legjitimitetin e njollosur nga mosdhënia e dorëheqjes pas humbjes në zgjedhje, Basha do mundohet ta kompensojë duke arritur një ‘fitore plebishitare’ në zgjedhjet në parti. Me anë të kësaj ai do të përhapë mesazhin: në PD nuk ka alternativë tjetër. Gjithaq, fitorja bindëse do ta lejojë të vazhdojë ta konceptojë dhe ta mbajë PD-në një sipërmarrje pa aksionerë, një trust lulehumbjeje ku partia dhe antarësia dështon, por ai dhe bordi i besnikëve ruajnë kuotat, bëjnë kompromiset dhe përfitojnë avantazhet.
Në finale, si herë të tjera, ky nuk është një tur për partinë apo Shqipërinë, por për menderen e Bashës. Pasi e ka bërë fytyrën mendere në disa zgjedhje të humbura, lëvizje të tilla ‘pa top’, si kjo e ‘turit faktmbledhës’ janë hiçmosgjë në repertorin e piruetave ku ai mban titullin Mjeshtër i Madh. /politiko.al/
