Policia dhe trupat ushtarake të Sri Lankës larguan me forcë protestuesit antiqeveritar të vendosur jashtë zyrës Presidenciale në Colombo, në një bastisje para agimit të premten me urdhër të Presidentit të ri të vendit.
Postimet e mediave sociale treguan oficerë, duke rrëzuar tendat e protestës dhe duke arrestuar demonstrues jashtë zyrave Presidenciale në Galle Face, dy ditë pasi vendi i goditur nga kriza u betua për një lider të ri.
Ish-kryeministri Ranil Wickremesinghe u betua zyrtarisht si President i vendit të mërkurën, dhe u bëri thirrje forcave të armatosura të ruajnë rendin publik.
Zëdhënësi i policisë SSP Nihal Thalduwa konfirmoi se nëntë burra u arrestuan, dhe do të dalin në gjykatë të premten.
Protestuesit kanë qëndruar jashtë zyrës Presidenciale për muaj të tërë, duke kërkuar dorëheqjen e ish-presidentit Gotabaya Rajapaksa, i cili u largua nga vendi në orët e para të 13 korrikut, dhe Wickremesinghe, një aleat kyç i Rajapksa-s.
Të dy kryesuan një krizë ekonomike që ka bërë që 22 milionë banorët e vendit të luftojnë për të blerë karburant, ushqim dhe nevoja themelore.
Forcat e armatosura tani ruajnë hyrjen e Sekretariatit Presidencial dhe duket se kanë kontroll të plotë të ndërtesës. Edhe pankartat që ishin varur në krye të sekretariatit janë hequr.
Disa vëzhgues kanë ngritur shqetësime për nivelin e forcës së përdorur në bastisje.
Shoqata e Avokatëve të Sri Lankës tha gjithashtu në një deklaratë se dënon “fuqësisht dhe pa rezerva” “përdorimin e forcës dhe dhunës” nga autoritetet “për të sulmuar protestuesit”.
Komisioni i të Drejtave të Njeriut i Sri Lankës gjithashtu dënoi bastisjen, duke e quajtur atë një “sulm brutal dhe të neveritshëm ndaj protestuesve paqësorë” dhe një “shkelje totale të të drejtave themelore të njerëzve”.
Shqetësim shprehën edhe diplomatët amerikanë dhe britanikë. “Ne kërkojmë përmbajtje nga autoritetet dhe qasje të menjëhershme në kujdesin mjekësor për të lënduarit”, shkroi ambasadorja e SHBA në Sri Lanka, Julie Chung.
Komisionerja e Lartë britanike në Sri Lanka, Sarah Hulton ishte “shumë e shqetësuar” për raportet për një shtypje në vendin e protestës. “Ne e kemi bërë të qartë rëndësinë e së drejtës për protestë paqësore”, shtoi ajo.
Burimi i lajmit: CNN. Përshtatur nga Tirana Today
