Presidenti amerikan Donald Trump deklaroi se do të vendosë sanksione më të fuqishme ekonomike ndaj Iranit, pas sulmit iranian me raketa kundër dy bazave ushtarake në Irak që strehojnë trupa amerikane.
“Për sa kohë që unë të jem President, Irani nuk do të lejohet të ketë armë bërthamore”, theksoi Trump.
“Qasem Soleimani trajnoi ushtri terroriste, përfshirë Hezbollahun, nxiti luftëra të përgjakshme civile, në të gjithë rajonin. Ai plagosi dhe vrau mijëra trupa amerikane.
Duke eliminuar Soleimanin ne i kemi dërguar një mesazh të fuqishëm për terroristët. Ne do të vendosim menjëherë sanksione shtesë ndëshkuese ekonomike ndaj regjimit iranian, të cilat do të qëndrojnë në fuqi derisa Irani të ndryshojë sjelljen e tij.
Irani duhet të braktisë ambiciet bërthamore dhe mbështetjen për terrorizmin. Ka ardhur koha që Mbretëria e Bashkuar, Gjermania, Franca, Rusia dhe Kina ta njohin këtë realitet.
Këto vende duhet të shkëputen nga marrëveshja bërthamore me Iranin dhe ne të gjithë duhet të punojmë së bashku për një marrëveshje të re me Iranin.
Gjithashtu duhet të bëjmë një marrëveshje që lejon Iranin të lulëzojë dhe përparojë.
Ushtria amerikane është rindërtuar plotësisht nën administrimin tim me një kosto 2.5 trilion dollarë. Forcat e Armatosura të SHBA janë më të forta se kurrë më parë. Raketat tona janë po aq të fuqishme, vdekjeprurëse dhe të shpejta.
Në ndërtim e sipër janë shumë raketa hipersonike.
Megjithatë, fakti që ne kemi këtë ushtri dhe pajisje të shkëlqyer, nuk do të thotë që duhet t’i përdorim ato. Fuqia amerikane, si ushtarake, ashtu edhe ekonomike është parandaluesi më i mirë”, tha ndër të tjera Trump.
