Presidenti i SHBA-ve, Donald Trump ka zgjatur me një muaj mbylljen kombëtare të Amerikës, duke u përkulur para ekspertëve të Shëndetit Publik dhe realitetit shkencor. Trump ka paralajmëruar se më e keqja e pandemisë së koronavirusit nuk ka ardhur ende.
Gjatë fjalës së tij të mbajtur në Shtëpinë e Bardhë, presidenti amerikan pretendoi se, nëse administrata e tij mban numrin e vdekjeve në 100 mijë, ajo do të kishte bërë “një punë shumë të mirë”.
Zgjatja e afatit shënoi një tërheqje poshtëruese për Trump, i cili më herët paralajmëroi se të dielën e Pashkëve do të rihapte shumë pjesë të vendit.
Ai njoftoi se periudha fillestare 15-ditore, e distancës sociale e nxitur nga qeveria federale, do të zgjerohej deri në 30 prill, teksa shtoi se shpresonte që normaliteti të kthehej deri më 1 qershor.
Udhëzimet konsistojnë në mos mbledhjen në grupe të mëdha dhe nxisin të moshuarit dhe cilindo që ka probleme ekzistuese shëndetësore të qëndrojnë në shtëpi.
“Modeli tregon se kulmi i nivelit të vdekjes mund të arrihet brenda dy javësh. Asgjë nuk do të ishte më keq sesa të shpallësh fitoren para fitores. Kjo do të ishte humbja më e madhe për të gjithë.
Mund të presim që nga 1 qershori të jemi në rrugën e duhur për t’u rikuperuar. Nëse ne do të mund ta mbanim këtë numër në 100 mijë – është një numër i tmerrshëm, ndoshta edhe më pak, por në 100 mijë, që të kemi ndërmjet 100 mijë dhe 200 mijë viktima- ne do kemi bërë një Punë të mirë”, tha Trump.
