Presidenti Trump kërkon nga India t’i japë ilaçin kundër COVID-19. Ai është shprehur se SHBA do të “hakmerrej” ndaj Indisë, nëse ajo do të refuzonte kërkesën e tij për lirimin e rezervave të një medikamenti. Një ilaç ky të cilin ai e cilësoi si kyç në luftën kundër Covid-19, raporton “SKy News”. Të shtunën, India ndaloi eksportin e ilaçit “pa asnjë përjashtim”. Urdhri erdhi pasi numri i rasteve pozitive të Covid-19 u rrit ndjesh në vend.
Të dielën që lamë pas, Trump ka kontaktuar me kryeministrin Narendra Modi, një ditë pasi vendi ndaloi eksportin e hydroxychloroquine, medikament i cili prodhohet në sasi të mëdha në këtë vend.
India shprehet se ende “po shqyrton” kërkesën. Hydroxychloroquine është shumë e ngjashme me Chloroquine, një nga ilaçet më të vjetra dhe më të njohura anti-malariale.
Por ilaçi i cili gjithashtu mund të trajtojë sëmundjet auto-imune si artriti reumatoid dhe lupus, gjithashtu ka tërhequr vëmendjen gjatë dekadave të fundit si një agjent i mundshëm antiviral.
