Një lajm tragjik ka tronditur sportin e golfit ditën e sotme, pasi është gjetur i pajetë trupi i sportistes spanjolle Celia Barquin Arozamena. Trupi i 22-vjeçares është gjetur në një fushë golfi në Soldwater Links, në Iowa (USA). Policët e pranishëm në vendngjarje, kanë gjetur edhe çantën e saj të golfit vetëm pak metra larg trupit të pajetë. Hetimet e para kanë zbuluar se Barquin është sulmuar në fushën Coldwater, ku ka gjetur vdekjen e menjëhershme.
Trupin e sportistes 22-vjeçare e kanë gjetur një grup të rinjsh, në një çantë të hedhur dhe më pas kanë njoftuar policinë, e cila ka zbuluar më pas se në çantë ndodhej trupi i pajetë e spanjolles. Në trup dukeshin qartë shenjat e një agresioni fizik, por do të jetë autopsia ajo që do të sqarojë arsyet e vdekjes. Dihet vetëm që në trup ishin të qarta shenjat e prerjes me thikë në trup dhe në qafë.
Policia ka ndaluar një bashkëmoshatar te golfistes, Collin Daniel Richards, që duhet të përgjigjet për akuzën e vrasjes. Ai jeton në një tendë afër fushës së golfit dhe i pat thënë një fqinji se dëshironte të vriste një femër. Në momentin e arrestimit ai kishte shenja gërvishtje në fytyrë dhe skuqje në dorën e majtë si dhe i kanë gjetur një thikë.
Barquin, e cila kishte lindur në Puente de San Miguel, vazhdonte studimet në Universitetin e Iowas, dhe ishte ndër golfistet më me perspektivë të viteve të fundit. Këtë vit, ajo u shpall kampione në garat si ”Big 12 Championship” dhe në Kampionatin Evropian në kategorinë e femrave amatore.
