Pas qëndrimit publik të Tedi Blushit se ekzistojnë prova me video për kreun e KED-së, Ardian Dvorani, gazetari Artan Hoxha thotë se zëdhënësi i Presidencës, duhet të thirret në Prokurori.
I ftuar në emisionin “Opinion” në Tv Klan, gazetari Hoxha tha se është i bindur se deklaratat e Presidencës për rastin e Gjykatës Kushtetuese dhe Ardian Dvoranit, janë shantazh. Në të kundërt, nëse ekzistojnë, duhet të ishin dërguar në Prokurori. Duke qëndruar në të njëjtën linjë, ai tha se për këtë rast duhet të thirret policia gjyqësore, i jepen provat dhe Prokurora nis hetimet.
“Dvorani do bëhet shembull”, Meta flet për videon korruptive
“Ky është rasti tjetër, që ky që është përfaqësues i Presidencës, urgjentisht duhet të thirret. Ç’është kjo video, aq më tepër që bëhet fjalë që është shantazhuar Gjykata Kushtetuese e Shqipërisë. Nëse këto prova ekzistojnë, urgjentisht Prokuroria duhet ta fillojë, sepse janë kërcënuar institucionet kryesore të vendit.
Problemi është në këtë rast që unë uroj që ‘Baba Takut’ mos t’i ketë humbur çanta. Është duke u bërë shantazh. Sepse nëse janë provat, ato publikohen. Thirret policia gjyqësore, i jepen provat dhe Prokuroria nis hetimet. Do kesh video plot këto ditë, video me prova, jo nga këto shantazhe”, ka thënë gazetari Artan Hoxha.
