Pas shpërthimit me tritol në Fushë-Krujë, policia menjëherë ka nisur nga hetimet, ku dyshohet se ngjarja ka ndodhur për shkak të konflikteve të djalit të zyrtarit. Burime jo zyrtare thonë se konfliktet e të birit mbeten pista kryesore ku po heton policia, lidhur me tritolin e vendosur mbrëmjen që lamë pas, në automjetin e zyrtarit të Bashkisë Fushë-Krujë.
Konfliktet e mëparshme të djalit të Vesel Xakës, dyshohet se janë bërë shkak për shpërthimin e eksplozivit. Të njëjtat burime nënvizojnë se për këtë arsye është marrë në pyetje Sabah Xaka, djali i 63-vjeçarit, raporton ‘Report TV’.
Ngjarja e rëndë ndodhi mbrëmjen e së dielës, rreth orës 23:00, në periferi të qytetit të Fushë-Krujës. Automjetit tip ‘Golf 6’, e parkuar në oborrin e një shtëpie, i është vënë një sasi lënde plasëse. Fatmirësisht nuk ka të lënduar, por vetëm dëme materiale.
Pronari i makinës, Vesel Xaka, 63 vjeç, është punonjës i Bashkisë së Krujës. Vetëm 10 ditë më parë, po në Fushë-Krujë, një tjetër automjeti që ndodhej gjithashtu i parkuar në oborr iu vendos tritol.