A mund të ndihmojë gjaku i pacientëve të shëruar, në trajtimin e koronavirusit? Kjo është pyetja që po mundon shumë së fundmi ekspertët, të cilët ende po kryejnë eksperimente të shumta. Në fakt, ekspertët ndahen në dy grupe, në pro dhe kundër kësaj teze.
Njerëzit të cilët janë shëruar nga koronavirusi i quajtur së fundmi Covid-19, kanë ende antitrupa ndaj koronavirusit që qarkullojnë në gjakun e tyre. Injektimi i këtyre antitrupave te pacientët e sëmurë mund të ndihmojë, të paktën teorikisht, në luftën kundër koronavirusit.
Nga ana tjetër, disa ekspertë bëjnë me dije se trajtime të tilla duhet të kalojnë së pari procesin e provave të mirëfillta laboratorike, përpara se të aplikohen te njerëzit. Kjo pasi nuk është e sigurtë nëse do të ketë efekte pozitive. Po kështu nuk dihet shkalla e efekteve anësore.
E gjithë kjo skemë lindi pasi një zyrtar i lartë kinez i shëndetësisë, ka bërë thirrje së fundmi për të trajtuar pacientët e prekur nga koronavirusi Covid-19 me plazmën e gjakut të pacientëve të shëruar.
Thirrja për të përdorur plazmën (lëngu ku ndodhen të gjithë elementët e gjakut) e këtyre pacientëve, është bërë nga kompania shtetërore farmaceutike China National Biotec Group.
Antitrupat janë proteina, të cilat sistemi imunitar i prodhon për të luftuar viruset, bakteret ose substancat e tjera, të huaja për organizmin. Antitrupat janë specifikë për secilin “pushtues”. Sidoqoftë, trupi ynë kërkon pak kohë për prodhimin e tyre. Nëse i njëjti virus/bakter përpiqet të hyjë sërish në organizëm, prodhimi i antitrupave është më i shpejtë.
