UEFA ka ndarë çmimet për vitin që lamë pas, në ditën kur u hodh edhe shorti i fazës së grupeve të Champions Leagues. “Lojtari më i mirë i vitit” u shpall kroati Luka Modric dhe jo Cristiano Ronaldo si e prisnin të gjithë, pasi ky çmim vlerësohet nga performanca në Champions dhe jo në Botëror, ku kroati ishte spektakolarë. Ylli portugez preferoi të mos udhëtonte fare drejt Montekarlos dhe nuk e ka komentuar aspak këtë situatë, madje nuk ka uruar edhe shokët e ish-skuadrës të cilët rrëmbyen çmimet.
Zlatko Dalic, trajneri i Kroacisë duket se nuk është befasuar aspak nga sjellja e Ronaldos, pasi ai është shprehur se portugezi është “egoist dhe unë kurrë nuk do ta doja atë në ekipin tim”.
Njeriu që udhëhoqi Kroacinë për në finalen e Botërorit të Rusisë u shpreh për “Sportske novosti”:
“Ronaldo nuk merr pjesë në ceremoninë e UEFA-s dhe ato komente rreth Lukas që fitoi atë çmim … nuk është e denjë të flas për të! Kjo vetëm vërteton atë që unë vazhdoj të them: Ronaldo është një egoist dhe unë kurrë nuk do ta dëshiroja atë në ekipin tim!
Ai është i vetmi lojtar që pavarësisht nëse ekipi humb, e vetmja gjë që ka rëndësi është që të shënoj një gol!”
Është e qartë që Dalic nuk është një tifoz i Ronaldos, por ai është i kënaqur me bashkëkombasin e tij, Luka Modric i cili ka zhvilluar një sezon fantastik me klubin dhe kombëtaren e tij.
“Luka Modric është një lojtar dhe person i madh, e gjithë fama dhe lavdia, titujt me Realin, nuk e ndryshuan fare. Do të ishte shumë herët që ai të tërhiqej nga kombëtarja, ai duhet të jetë në kulmin e tij në Euro 2020.”
