Një ngjarje e rëndë ndodhi sot në Letoni, ku nëntetarja Zarife Hasanaj humbi jetën në krye të detyrës, gjatë misionit në NATO.
Hasanaj humbi jetën gjatë një operacioni për demontimin e minave, si dhe mbetën të plagosur dy efektivë të tjerë shqiptarë, Klodian Tanushi dhe Julian Kapaj.
Lidhur me këtë ngjarje ka reaguar edhe presidenti Ilir Meta si dhe ministrja e Mbrojtjes, Olta Xhaçka.
“Presidenti i Republikës, Ilir Meta me hidhërim të thellë është informuar për ngjarjen tragjike të ndodhur me kontigjentin e Forcave të Armatosura, në kuadër të asgjësimit të municioneve dhe lëndëve eksplozive në Letoni, ku ka humbur jetën në krye të detyrës Nëntetare Zarife Hasanaj si dhe kanë mbetur të plagosur Komandanti i Kontingjentit, Major Klodian Tanushi, si dhe dhe Rreshteri Julian Kapaj.
Presidenti Meta i shpreh ngushëllimet më të thella familjes se Nëntetares Zarife Hasanaj, si dhe pjesëtarëve të kontingjentit të FA në Letoni.
Presidenti Meta po ndjek me shqetësim gjendjen e efektivëve të plagosur dhe u shpreh urimet për shërim sa më të shpejtë Major Klodian Tanushi dhe Rreshterit Julian Kapaj.”, shkruhet në reagimin e Metës.
Ministrja Xhaçka po ashtu shpreh ngushëllimet, ndërsa shton se këtë humbje të madhe, do e përballojnë bashkë:
Dhimbje e madhe për humbjen e dëshmores së Forcave të Armatosura, nëntetares Zarife HASANAJ. Në këtë moment të vështirë jemi pranë familjes së vajzës sonë e do të vazhdojmë t’i gjendemi pranë, për të përballuar bashkë humbjen e madhe. Respekt dhe mirënjohje pafund për Zarifen, për sakrificën, guximin dhe vendosmërinë në përballjen me rrezikun gjatë përmbushjes së detyrave të saj. Djemve tanë të plagosur, major Klodian TANUSHI dhe rreshter Julian KAPAJ, u uroj shërim të shpejtë dhe kthim shëndoshë e mirë pranë familjes sonë të Forcave të Armatosura.
