Fiorin Durmisha përfundimisht do të veshë fanellën e kombëtares greke. Edhe pse kishte veshur 6 herë fanellën kuqezi të 21 vjeçarëve dhe kishte shënuar një gol, Durmishaj refuzoi ftesën e Christian Panuccit për në kombëtaren A, pasi priste ftesë nga ‘kombëtarja e tij’, Greqia.
Fati duket se ka qenë me të dhe grumbullimi ka ardhur më shpejt se e kishte menduar. Dëmtimi i sulmuesit kryesor të ekipit helen Konstantinos Mitroglou ka bërë që trajneri Angelos Anastasiadis t’i dërgojë një ftesë shqiptarit.
Mitroglou u dëmtua në përballjen me Lihtenshtejnin, që në minutat e para të ndeshjes, të cilën Greqia e fitoi me rezultatin e pastër 2-0 në transfertë. Durmishaj ka marrë ftesën për të qenë pjesë e helenëve në një sfidë mjaft të rëndësishme, atë përballë Bosnje Hercegovinës. Në këtë mënyrë, marrin fund të gjitha dilemat, apo shpresat se lojtari mund t’i bashkohet ekipit tonë përfaqësues.
22-vjeçari që luan me ekipin e Panioniosit ka shpërthyer këtë sezon me 6 gola në 24 takime. Shtatlarti u llogarit nga tekniku shqiptar për ndeshjet e radhës, ku mund të kthehej në të rëndësishëm për ekipin tonë, por zgjodhi të ishte një “gomë rezervë” për skuadrën greke. Durmishaj tashmë është në të gjitha efektet një futbollist i kombëtares greke. Sulmuesi vlonjat i cili refuzoi Shqipërinë për Greqinë ka marrë dokumentacionin e nevojshëm nga Federata Shqiptare e Futbollit për të qenë pjesë e përfaqësueses helene, duke vulosur përfundimisht të ardhmen e tij në rang kombëtaresh që do të jetë te Greqia.
