Policia ka vënë në pranga mëngjesin e sotëm dy nga grabitësit me maska që hynë me forcë në shtëpi dhe kërcënuan dy të moshuarit në Mallakastër. Përparim Merdani, pronari i shtëpisë ka treguar momentet e tmerrin kur grabitësit u futën në banesë dhe shprehet se ata e kanë goditur ndërsa mbanin në duar shkopinj gome, dhe kërkonin me ngulm dhomën ku i moshuari mbante paratë.
Së fundmi vëllai i tij kishte ardhur nga Anglia dhe i kishte lënë disa para për kurimin e nënës, e për këtë shkak Përparimi dyshon se grabitësit mund të kenë dëgjuar se mbante lekë në shtëpi.
“Dy çunat i kisha në sport, unë isha lart me nënën, mbesa shikonte telenovela. Në një moment na zë gjumi, ata atëherë erdhën. Dëgjova ulërimën e mbesës dhe u ngrita. Ata erdhën me thika tek koka na thanë “mos lëvizni”.
Mua më qëlluan, më goditi tek hunda, më iku gjak, më është ënjtur dhe syri. Pasi kontrolluan ishte një dhomë me çelës, e shqyen derën e hynë tek dhoma ku kishim lekët, 1 milion e 700 mijë lekë. Ishin me maska nga t’i njihja.
Tre veta, kishin shkop gome dhe thika në duar, m’i mbanin thikat në kokë. I kërcënuar më parë? Jo. Jo. Asnjëherë. I linim dyer e shtëpisë hapur. As kur flija nuk e mbyllja derën e shtëpisë. Nuk i njihja fare si persona ata që janë arrestuar.
Para ca ditësh erdhi vëllai nga Anglia dhe më la disa para për kurimin e nënës. Mund ta kenë dëgjuar për këtë. Këtu s’ka as mbrojtje asgjë, jemi të frikësuar tani” – tha Përparimi.
NJOFTIMI I POLICISË
Specialistët për Hetimin e Krimeve në Komisariatin e Policisë Mallakastër, në bashkëpunim me Specialistët për Hetimin e Krimeve të Rënda në DVP Fier, pas marrjes së njofitmit se në një banesë në fshatin Greshicë kishin hyrë të maskuar 3 persona ku nën kërcënimin e armëve të ftohta kishin dhunuar familjarët dhe i kishin marrë një sasi lekësh, u ngrit grupi hetimor i cili bëri të mundur zbardhjen e ngjarjes dhe ndalimin në kohë rekord të autorëve të dyshuar.
Pas një pune hetimore të mirëorganizuar, u bë ndalimi i shtetasve:
K.S, 21 vjeç, banues në Panahor.
A.M, 22 vjeç, banues në Panahor (të dy të dënuar më parë për vjedhje me armë në Greqi.)
Gjithashtu u shpall në kërkim dhe po punohet për kapjen e bashkëpunëtorit tjetër, shtetasit M.H.
Materialet proceduriale i kaluan Prokurorisë pranë Gjykatës së Shkallës së Parë Fier në ngarkim të këtyre tre shtetasve për veprën penale “Vjedhje me dhunë e kryer në bashkëpunim”.
