Presidenti Meta është pyetur nga gazetarët, për takimin e zhvilluar me ambasadoren amerikane Yuri Kim. Ai theksoi se takimi ishte shumë pozitiv, dhe se SHBA pret anëtarësimin e Shqipërisë në BE. I pyetur për deklaratën e ambasadores së SHBA, Yuri Kim e cila tha se kreu i PD ka në dorë arritjen e marrëveshjes për konsensusin politik për Zgjedhoren, Meta u tregua shumë diskret në përgjigje.
“Nuk kam qenë pjesë e diskutimeve, dhe nuk e shoh të arsyeshme që të bëhem. Apeloj për konsensus sa më të shpejtë, është detyrim për qytetarët shqiptarë që të kenë sa më shumë siguri që vota e tyre do të jetë e lirë dhe e barabartë.
Është detyrim ndaj procesit të integrimit, data 8 qershor është shumë e rëndësishme dhe shpresoj që të arrihet sot, nesër apo ditët e ardhshme, që KE të shënojë një rezultat pozitiv.
Duket se ka një progres, dhe duket se çështja ka mbetur për mirëbesim te disa aspekte dhe elementë që kurrsesi nuk duhet të rrezikojnë konsensusin.
Opozita nuk ka vendosur si kusht një qeveri transitore, dhe mendoj se mospasja e një kushti të tillë e bën konsensusin të mundshëm. Shpresoj që të kemi një lajm pozitiv sa më shpejt”.
