“Top Channel” ka paditur në Gjykatën e Rrethit Tiranë aktoren e humorit Delinda Disha. Ajo tashmë është pjesë e programit të humorit “Klanifornia”. Por burime për “SYRI.net”, zbulojnë disa prapaskena që kanë ndodhur me aktoren e dashur për publikun shqiptar.
“Top Channel” ka paraqitur në gjykatë si provë kontratën e aktores me spektaklin e humorit “Portokalli”, e cila ishte një kontratë 2-vjeçare që fillonte nga viti 2017-2019. Ndërkohë që nga pala e aktores është paraqitur kontrata e saj një-vjeçare, që ka patur me “Top Channel” në periudhën 2017-2018.
Në fletë-thirrje thuhet se pala e paditur, pra Delinda Disha, ka shkelur kontratën, dhe se ka nxjerrë sekrete artistike. Por përtej përballjes në gjyq, Delinda Disha vijon punën në “Klanifornia”, pasi kemi parë dhe spotin e ri të fillim-sezonit të dytë.
E kontaktuar nga “SYRI.net” mbi këtë çështje, aktorja Delinda Disha nuk preferoi të komentonte shumë mbi betejën ligjore me “Top Channel”, por deklaroi vetëm se: Do vazhdoj dhe këtë sezon me role shumë të dashura për publikun, çdo të shtunë në mbrëmje në “Klan”.
