Vala e re e refugjatëve që kalojnë përmes Ballkanit për të kërkuar mbrojtje në BE, po sjell dëshmi të reja të dhunës dhe abuzimeve, veçanërisht ndaj grave dhe fëmijëve.
“Në kufirin Turqi -Bullgari, një polic bullgar më kapi për qafe dhe më flaku në dysheme. Pastaj më goditi këtu,” tha një grua nga Afganistani në mesin e 30-tave, duke treguar anën e majtë të legenit. Si pasojë e dhunës së ushtruar gruaja, e cila ishte në muajin e gjashtë të shtatzënisë, humbi fëmijën e saj.
“Ky udhëtim më mplaku,” i tha ajo BIRN-it duke psherëtirë, dhe duke folur në anonimitet.
Ajo tha se ajo iku nga Afganistani për shkak të dhunës së shfrenuar atje, për tu përballur me të njëjtat probleme gjatë rrugës “Ballkanike”, që sipas saj ishte “shumë më të këqija se jeta e përditshme në Afganistan.”
Tre gra që kanë kaluar përmes rrugës së Ballkani, duke përjetuar tmerrin e dhunës dhe abuzimeve, kanë dhënë një intervistë për reporterët e BIRN. Detaje nga intervista tregojnë se policia bullgare kufitare i ka dhunuar dhe plaçkitur refugjatët e rinj që kalojnë përmes Ballkanit për të shkuar në Evropë.
“Kur arritëm në një pikë të caktuar na u desh të prisnim në pyll, prandaj ndenjëm atje për 9 ditë. Në Bullgari nuk na dhanë as ujë e as ushqim. Nipi im është i sëmurë mendor dhe e kapën krizat. Vendosëm të iknim. Folëm me trafikantin që po na udhëhiqte dhe ai na tha të shkonim në një vend ku grupi që kishte qenë sapo ishte larguar. Kur arritëm atje, erdhën disa njerëz me maska. Ata ishin të veshur me uniforma policie por u dukeshin vetëm sytë. Ne ishim ndarë në dy grupe, burrat në njërën anë, dhe tre-katër gra në anën tjetër. Sapo hynë filluan të bërtisnin “paratë, telefonat, dokumentet!”. Mendova se policia nuk kërkonte para dhe telefona, por vetëm dokumentet. Na kontrolluan trupin, madje kërkuan edhe nëpër flokë. Kisha një telefon, që e kisha futur te rrobat e vajzës, sepse isha shumë nervoze. Kur ja gjetën telefonin, e gjuajtën me grusht në kraharor. Gjuajtën vajzën 11 vjeçe, burrin dhe gjithë të tjerët. Ne gratë kemi shumë probleme, në veçanti kemi probleme mendore. Marrim ilaçe, unë madje kaloj edhe kriza. Tani që kam probleme mendore, përdor disa drogëra psikoterapie. Marr ilaçe në mëngjes dhe pasdite. Më kanë rënë dhe dhëmbët nga stresi. Jam nëna e disa fëmijëve dhe kam humbur shtëpinë time, paratë e mia… Ky udhëtim më mplaku. Ne jetojmë nëpër kampe, nuk dimë as gjuhën e tyre, nuk dimë as të kërkojmë një batanije në të ftohtë,” thotë një grua të cilën ky udhëtim e ka lënë me probleme mendore.
Një grua tjetër, nënë e katër fëmijëve, e cila ka pësuar një tronditje të fortë gjatë këtij rrugëtimi thotë:
“Kam katër fëmijë dhe situata ime po përkeqësohet dita-ditës. Kam probleme mendore. Ndodh papritur tu ulërij fëmijëve të mi kur më afrohen. Është e vërtetë. Dal për të ecur rreth pesë minuta për tu qetësuar, por çmendem kur mendoj se kam humbur çdo gjë që kisha:shtëpinë time, jetën time… Ishte vetëm një copë buke në çantë. Duhej ecur gjashtë ose shtatë orë, pa ndaluar. U dhashë fëmijëve një copë të vogël buke, e u thashë të imagjinonin se ishte çokollatë. Ta shkrinin në gojë dhe të mos e gëlltisnin. Duhet të rrinin sa më larg vdekjes. Dyqane nuk kishte, ishin shumë larg. Vajzës po i binin thonjtë. Këpucët i ishin çarë dhe nuk mund të ecte më shumë. Ecnim nëpër gurë dhe kishim flluska nëpër këmbë. Mendova se fëmijët do të vdisnin nga uria ose etja, nga rreziqet e rrugës, nga çdo gjë, ç’të shtoj më shumë? Vetëm Zoti e di se kur i kujtoj këto gjëra më duken sikur po ndodhin tani…”
“Pasi kaluam kufirin Serbi- Bullgari, policia serbe na ktheu në Bullgari. Na lanë në mes të pyllit, në mes të errësirës. Policia bullgare kishte maska, mund tu shikoje vetëm sytë, dhe kishin veshur uniformat. Ata na kërkuan paratë, dhe ne ishim shumë larg kampit. Na pyetën ku kishim fjetur dhe unë i thashë: “Morëm një dhomë në hotel”. Ata kontrolluan burrin, Sardarin, por nuk po i mbante ai paratë. Ato i kisha fshehur unë, nën rroba. Kërkuan të më kontrollonin mua por unë bëra rezistencë, u thashë që jam myslimane. Nuk i lashë të më preknin. Pavarësisht kësaj ata donin të më kontrollonin, “hiqe xhaketën”, urdhëruan. Paratë ranë në tokë dhe unë u përpoqa ti mbuloj më këmbë. Ata i panë dhe i morën…”, njëra prej grave tregon sesi u grabitën dhe u abuzuan nga policia. /Burimi: BIRN
Përshtati redaksia Tirana Today
