Universiteti Johns Hopkins bën me dije se në 24 orët e fundit në SHBA kanë humbur jetën 1,891 persona nga koronavirusi.
Kështu shkon në 38,664 numri total i personave që kanë ndërruar jetë si pasojë e COVID-19. Që nga shpërthimi i koronavirusit, në SHBA janë regjistruar mbi 738 mijë persona të infektuar nga virusi vdekjeprurës.
Mbi 68 mijë persona janë shëruar nga COVID-19 në SHBA. Numri i rasteve aktive në vend është 631,623, ndërsa mbi 13 mijë persona ndodhen në gjendje të rëndë shëndetësore.
SHBA është vendi më i prekur nga koronavirusi, teksa regjistron pothuajse 1/3 e rasteve në të gjithë botën. Vendi më i prekur në SHBA është New York, i cili numëron mbi 241 mijë raste infektimi dhe mbi 17 mijë viktima.
Vendet më të prekura pas SHBA-ve janë Italia, Spanja, Franca, Gjermania, Mbretëria e Bashkuar, Irani, Kina, Turqia, Belgjika etj.
Më shumë se 2,3 milionë njerëz nga e gjithë bota janë prekur nga COVID-19, ndërsa mbi 160 mijë persona kanë humbur jetën.
