Mbrëmjen e djeshme, Tirana u mund 0-1 në “Air Albania” nga Crvena Zvezda, duke u eliminuar në raundin e dytë eleminator të Champions League. Trajneri serb, Dejan Stankovic, në një prononcim për mediat tha se ka mbetur i mahnitur nga mikpritja që i është bërë në vendin tonë.
“Nuk është se ka rëndësi sa gola janë bërë, 1 apo 10. Ne kualifikimin e marrim. Kishim një ekip shumë të përgatitur dhe të mirë përballë nesh, prandaj bravo dhe bravo për Tiranën. Fati është një faktor shumë i rëndësishëm në jetë dhe në sport. Fatin duhet ta meritosh. Kjo do të thotë që ne e kemi merituar fatin. Mikpritja shqiptare? E thashë edhe dje, por do e përsëris dhe sot që kam përshtypjen e mirë për njerëzit që na mikpritën, faleminderit nga zemra”.
Tirana u eliminua nga Crvena Zvezda, pasi humbi me rezultatin 1-0. Kampionët e Shqipërisë ikin me kokën lart nga Champions, sepse luajtën si të barabartë me një kundërshtar që ka 20-fishin e buxhetit të tyre. Tirana luajti me zemër në fushë, dhe dha gjithçka nga vetja.
