Pamjet që tashmë janë bërë virale, tregojnë një skenë tmerri ku tifozët kanë nxjerrë nga zyra drejtorin e stadiumit “Gagarin”, dhe e kanë hedhur në koshin e plehrave. Këto pamje skandaloze tregojnë se si bashkërisht tifozët, fusin me dhunë në koshin e mbeturinave drejtorin Aleksander Ovçarenko.
Teksa ai tentonte të bënte rezistencë dhe të dilte nga koshi, tifozët e irrituar e mbërthenin fort dhe e shtynin të futej brenda. Por çfarë ndodhi që u krijua kjo situatë konfliktuale? Vendimi i marrë nga drejtori i stadiumit “Gagarin”, për të larguar nga aty skuadrën ukrainase të Desnas, ka irrituar së tepërmi tifozët e këtyre të fundit.
Ovçarenko kishte kërkuar që Desna të mos i luante më ndeshjet si vendas në stadiumin “Gagarin”. Kaq ka mjaftuar që nga tifozët të vinte ky reagim i dhunshëm. Ata kanë marrë hak ndaj drejtorit.
Tifozët kanë shkuar në zyrën e Ovçarenkos, dhe e kanë nxjerrë atë me dhunë. Më tej e kanë hedhur në koshin e plehrave, duke e paralajmëruar për vendimet që ka marrë.
