Ka kaluar një vit nga dita kur banorët e Astirit nisën rezistencën në mbrojtje të banesave të tyre, të cilat preken nga projekti i Unazës së Madhe. Edhe sot, si çdo ditë tjetër ata kanë dalë në protestë kundër shembjes së objekteve .
Në këtë një-vjetor nuk ka munguar prania e ish-deputetit demokrat Klevis Balliu, i cili u ka dalë në mbështetje banorëve që në fillim.
Po ashtu, ndryshe nga ditët e tjera, sot, protestuesit kanë vendosur një video-projektor, ku transmetoheshin disa nga momentet më kryesore të protestave gjatë këtyre 12 muajve.
“Kështu fitohet e drejta duke u përballur me të. Jemi për fitore, asgjë tjetër. Duam drejtësi. Koha e Edi Ramës me bandat kriminale ka mbaruar”, ishin disa nga thirrjet e banorëve.
“Ne iu bëjmë thirrje qytetarëve shqiptarë që mos të largohen, por të shporrim këtë qeveri dhe të sjellim një qeveri tjetër që të dridhet nga vota e qytetarëve. Kauzat nuk fitohen nëpër kafe, duke parë televizor, por të bashkohemi dhe të shporrim këta politikanë”.
Ish-deputeti Klevis Balliu, i cili është arrestuar dy herë për shkak se ka kundërshtuar forcat e policisë gjatë protestave, u shpreh se kryeministri Edi Rama nuk arriti t’i mposhte këto heronj.
“Opozita e bashkuar kanë qenë në mbështetje të kësaj kauze, e kemi mbështetur këtë kauzë që në ditën e parë dhe do të vijojmë që ta bëjmë”, tha Balliu.
