Në Pallatin e Kulturës në Bajram Curri të Tropojës janë hequr me forcë materialet zgjedhore nga KZAZ-ja numër 9.
Disa persona të pa identifikuar kanë thyer xhamat dhe dyert mëngjesin e sotëm dhe më pas kanë hequr materialet që ndodheshin brenda ambientit.
Kjo ngjarje erdhi pas kërkesave të Bashkisë së Bajram Currit ndaj drejtuesve të KZAZ nr.9, që ata të dorëzonin deri sot në orën 10:00 të gjitha materialet zgjedhore në Bashki, duke vënë kështu në zbatim dekretin e Presidentit Meta.
Pas anulimit të zgjedhjeve të 30 Qershorit nga presidenti Meta, shumë prej bashkive të djathta kanë marrë vendimin për lirimin e qendrave të KZAZ-ve.
Ndërkohë tensione dhe përplasje ka pasur edhe në Shkodër, pasi është kërkuar që të lirohet KZAZ-ja numër 2 në këtë qytet, duke çuar edhe në debate mes policisë bashkiake dhe policisë së rendit.