India ka tërhequr vëmendjen e të gjithëve me mënyrën se si i ndëshkon shkelësit e masave të vendosura për frenimin e përhapjes së koronavirusit.
Në disa raste shkelësit janë detyruar që të bëjnë ushtrime sforcuese në mënyrë që të mos e përsërisnin më shkeljen.
Mirëpo rasti më i fundit është akoma më i rrallë!
Dhjetë turistë të huaj nga Izraeli, Meksika, Australia dhe Austria u kapën duke shëtitur në qytetin Rishikesh në kundërshtim me rregullat e izolimit.
Zyrtari lokal i policisë i detyroi ata që si ndëshkim të shkruanin 500 herë: “Unë nuk i zbatova rregullat e izolimit, më falni”.
Autoritetet thanë se ky dënim ishte dhënë për t’i dhënë një mësim edhe 700 turistëve të tjerë që ndodheshin në zonë të cilët i kishin shkelur rregullat.
Kujtojmë se aktualisht India ka rreth 8,300 të prekur nga COVID-19.
