Kryeministri Rama ka folur sot në lidhje me sigurinë ushqimore në vend, teksa deklaroi se personat përgjegjës do të dënohen me 15 vite burg dhe do tu konfiskohen asetet e prodhimit.
Ndër të tjera, Rama tha se nuk është e vërtetë që në “Shqipëri hahet helm”. Nëse ushqimet bujqësore do të kishin hormone, sipas Ramës do të ishte e pamundur që vendi të kishte këtë trend pozitiv të eksporteve.
“Dëgjojmë të thuhet se në Shqipëri hahet helm, kjo është e pavërtetë, sikundër është e dhimbshme të ndëshkohet sipas këtij perceptimi që ushqehet edhe nga media, fermerët shqiptarë, sipërmarrësit që i janë kushtuar eksportit, që vitin e kaluar kanë eksportuar 300 mije tonë produkte shqiptare dhe nuk kanë marrë mbrapsht asnjë kamion. Nëse ushqimet tona bujqësore do të ishin produkt i hormoneve do të ishte e pamundur që vendi të kishte këtë trend pozitiv të eksporteve dhe të kalohej filtri rigoroz i BE”, tha Rama.
