Drejtuesi i portalit ‘Syri.net’ ka treguar versionin e tij të ngjarjes, në lidhje me përhapjen e alarmit fals për tërmetin që supozohej të ndodhte mbrëmë rreth orës 23:30. Në një lidhje telefonike në emisionin “Opinion”, Peka tha se ky që po i ndodh portalit të tij, është një sulm nga qeveria. Ai zbuloi se policia pasi ka shkuar në zyrat e ‘Syri.net’, i kanë pyetur gazetarët nëse janë të siguruar në punë dhe sa paguhen. Po kështu, gazetarëve u janë sekuestruar telefonat, e i kanë bërë presion kryeredaktorit.
“Policia erdhi në redaksi dhe më lajmëruan gazetarët. U thashë t’i merrnin dhe të bënin verifikimet e nevojshme. Më pas mora vesh që policia, gazetarët s’i ka pyetur fare për lajmin.
I kanë pyetur nëse janë të siguruar në punë, sa paguhen dhe pyetje të tjera si këto. Na kanë sekuestruar të gjithë telefonat, dhe mund t’ju tregoj bisedat. Sot kanë marrë edhe kryeredaktorin dhe i kanë bërë presion. I kanë thënë ‘thuaj që lajmin ta dha Peka dhe ik në shtëpi’. Ky është një sulm që po më bëhet nga Rama. Gjithsesi unë jam këtu”, përfundoi Peka.
