Deputeti demokrat Agron Gjekmarkaj ka deklaruar mesditën e sotme në mbledhjen e Konferencës së Kryetarëve se opozita nuk pati një ofertë reale, dhe se e gjitha ishte strategji e PS-së. Ai tha se në të vërtetë, opozita nuk ka pasur asnjë ofertë reale dhe nuk ka humbur asgjë. Socialistët thanë se opozita nuk propozoi asnjë emër, ndërsa demokratët akuzuan shumicën se shkeli paktin e arritur. Raundi i katërt për zgjedhjen e Presidentit të ri do të mbahet të shtunën, më datë 4 Qershor.
“Përtej krizave që mund të ketë opozita, ajo është atje me 63 deputetë me 67 mijë vota diferencë në zgjedhjet e fundit me mazhorancën. Unë e shoh që flitet për opozitën, sikur humbi një shans për të pasur një President. Në fakt opozita nuk ka pasur asnjë ofertë reale, dhe nuk ka humbur asgjë.
Ju keni dashur të hyni në këtë fazë për ta zgjedhur vetë. Nuk ja keni ofruar ju zgjedhjen e Presidentit opozitës, por ja ofron Kushtetuta. Ju bëtë një strategji për të nxjerrë një President që nuk dihet nga do dalë, do dalë nga askundi për të qenë askushi.
Jo se ju nuk e keni të drejtën për të propozuar, ju keni një mbingarkesë pushteti piramidal dhe ishte një mundësi për të bërë një nisje të re. Meqenëse po shkoni drejt zgjedhjes ashtu siç deshët, mos lejoni që në krye të shtetit të vendoset një askushi”.
