Akademiku i njohur Artan Fuga e ka cilësuar si një ditë të shënuar ditën e sotme e cila përkon me përfundimin e punimeve të Kuvendit për legjislaturën 2017-2021.
Sipas tij, Kuvendi i kësaj legjislature është një Kuvend i turpit, pasi ka prodhuar ligjet më të këqija, antidemokratike dhe idiote në botë.
Fuga ka sulmuar dhe deputetët e opozitës, të cilët i ka quajtur si “kooperativistë” e të pa shkollë që sipas tij u bënë vegla anti-kultutës dhe mizerjes.
Postimi i Fugës në rrjetin social, Facebook
Sot ditë e shënuar! Mbylli punimet, theu qafën Kuvendi i turpit! Nuk ka logore që e lan turpin në ballin e këtij parlamenti që prodhoi ligjet më të këqia, antidemokratike dhe idiote në botë!
Turpi është në ballë edhe te Komisioni i edukimit, medias arsimit, për ata gjoja opozitarë dhe kooperativistë, infermiere që u marrin të keqen infermiereve, edukatore cerdhesh që u marrin të keqen edukatoreve, në thelb të pashkollë që u bënë vegla të antikulturës, antishkencës dhe mizerjes anti-intelektuale! Historia i nxorri me turp në breg të kënetës! Ik parlamenti i turpit ik! Të shpëtojë Shqipëria nga ty!
Në ditën e fundit për legjislacionin 2017-2021, Kuvendi i Shqipërisë ka votuar për kreun e ri të Autoritetit të Mediave Audiovizive (AMA). Me 83 vota pro, Kuvendi zgjodhi Armela Krasniqin si kryetare të këtij institucioni, ndërsa kandidati tjetër Alket Dibra mori vetëm 9 vota.
Ky vendim i Kuvendit, vjen në kundërshtim me këshillën e dhënë nga BE dhe OSBE. Pak para votimit për kreun e AMA-s në Kuvend, delegacioni i Bashkimit Europian në Shqipëri u ka bërë thirrje ligjvënësve shqiptarë ta shtyjnë këtë procedurë bashkë me emërimin e anëtarëve të bordit të këtij autoriteti në muajin shtator, nisur nga akuzat e opozitë se maxhoranca po tenton ta kapë këtë institucion.
