Pas dy motrave dhe mamasë, ka humbur jetën edhe djali 12-vjeçar i familjes Gjoka. Enriko Gjoka 12 vjeç, fatkeqësisht nuk ia ka dalë t’i mbijetojë plagëve të marra nga shpërthimi i bombolës së gazit, në hotelin e tyre në Velipojë.
I mituri ka ka ndërruar jetë sot në Itali, katër ditë pas ndarjes nga jeta të nënës së tij, Alketa Gjoka. Enriko së bashku me dy motrat, Klarisën e Danielën dhe nënën e tij u dërguan në Itali për kurim, por asnjë prej tyre nuk ia doli dot mbanë.
Në fillim të muajit gusht, ndërruan jetë vajzat e familjes Gjoka, Daniela 19-vjeçe dhe Klarisa 15-vjeçe. Me humbjen edhe të Enrikos, shkon në katër numri i viktimave nga tragjedia e Velipojës që ndodhi më 4 qershor të këtij viti, kur në hotelin e familjes Gjoka pati shpërthim gazi.
Shpërthimi në Velipojë ka qenë shumë i fuqishëm, duke lënë dëme të konsiderueshme e shkatërruar çdo gjë në katin e parë ku ndodhej restoranti.
